पाकिस्तानने (India Pakistan War) भारताच्या जम्मू काश्मीरसह अन्य (Ceasefire Violation) भागात युद्धविराम जाहीर झाल्यानंतर ड्रोन हल्ले केले. काही तासांतच युद्धबंदी तोडण्याचे काम पाकिस्तानने केले. भारतीय सैन्याने पाकिस्तानच्या या हल्ल्यांना तिखट प्रत्युत्तर दिले. यानंतर आता परराष्ट्र मंत्रालयाने पाकिस्तानने युद्धविरामाचं उल्लंघन केल्याचं मान्य केलं आहे. परराष्ट्र मंत्रालयाचे सचिव विक्रम मिस्त्री यांनी शनिवारी रात्री प्रसारमाध्यमांशी संवाद साधला.भारत आणि पाकिस्तानमधील युद्धबंदीच्या उल्लंघनाबाबत, परराष्ट्र सचिव विक्रम मिस्री यांनी शनिवारी (१० मे २०२५) उशिरा सांगितले की, लष्कराला कठोर कारवाई करण्याचे आदेश देण्यात आले आहेत. ते म्हणाले की, काही तासांतच, पाकिस्तानने भारत आणि पाकिस्तानच्या डीजीएमओंमध्ये आज संध्याकाळी लष्करी कारवाई थांबवण्यासाठी झालेल्या कराराचे “घोर उल्लंघन” केले आहे.
विक्रम मिस्री यांनी माध्यमांना सांगितले की, भारतीय सैन्य पूर्ण दृढनिश्चयाने प्रत्युत्तर देत आहे आणि सीमेवरील अतिक्रमण थांबवण्याचा प्रयत्न करत आहे. ते म्हणाले की पाकिस्तानची ही कृती “अत्यंत निषेधार्ह आहे आणि याची संपूर्ण जबाबदारी पाकिस्तानची आहे. ते म्हणाले, “सशस्त्र दल परिस्थितीवर बारकाईने लक्ष ठेवून आहेत आणि आंतरराष्ट्रीय सीमा आणि नियंत्रण रेषेवर पुन्हा उल्लंघन झाल्यास कठोर कारवाई करण्याचे निर्देश देण्यात आले आहेत.”
परराष्ट्र सचिवांनी सांगितले की, आम्हाला अपेक्षा आहे की पाकिस्तान परिस्थितीचे गांभीर्य समजून घेईल आणि हे अतिक्रमण तात्काळ थांबवण्यासाठी ठोस पावले उचलेल. भारतीय सैन्य परिस्थितीवर सतत लक्ष ठेवून आहे आणि कोणत्याही प्रकारच्या उल्लंघनाला जोरदार आणि निर्णायक प्रत्युत्तर देण्यासाठी पूर्णपणे सज्ज आहे.
तीन दिवस चाललेल्या संघर्षानंतर भारत आणि पाकिस्तानमध्ये युद्धबंदी झाली होती हे उल्लेखनीय आहे. भारतीय परराष्ट्र मंत्रालयाने सांगितले की, शनिवारी संध्याकाळी ५ वाजल्यापासून युद्धबंदी लागू झाली, परंतु अवघ्या चार तासांतच पाकिस्तानने युद्धबंदीचे उल्लंघन केले आणि सीमेपलीकडून गोळीबार सुरू केला. तसेच, ड्रोनद्वारे अनेक शहरांना लक्ष्य करण्यात आले.
यापूर्वी, भारत सरकारने दहशतवादाविरुद्ध सुरू असलेल्या लढाईबाबत एक मोठा निर्णय घेतला. भविष्यात कोणतीही दहशतवादी घटना घडली तर ती भारताविरुद्ध युद्धाची कृती मानली जाईल, असा कडक संदेश सरकारने दिला होता. भारत सरकारमधील उच्चपदस्थ सूत्रांनी सांगितले होते की, भारताने निर्णय घेतला आहे की भविष्यात होणारे कोणतेही दहशतवादी कृत्य भारताविरुद्ध युद्ध मानले जाईल आणि त्यानुसार त्याला प्रत्युत्तर दिले जाईल.
