नाशिक जिल्ह्याचा शिवसेना उद्धव बाळासाहेब ठाकरे पक्षाचे खासदार संजय राऊत (Sanjay Raut) यांनी शुक्रवारी (ता. 15 ऑगस्ट) दौरा केला. यावेळी त्यांनी मनसे अध्यक्ष राज ठाकरे आणि शिवसेना ठाकरे गटाचे प्रमुख उद्धव ठाकरे यांचे दोन्ही पक्ष मिळून महानगरपालिकांच्या निवडणुका लझणार आणि जिंकणार, असा दावा केला. त्यांनी केलेल्या या दाव्यामुळे मनसे आणि ठाकरे गटाची युती झाली असल्याच्या चर्चा राजकीय वर्तुळात रंगलेल्या आहेत. पण ठाकरेंनी मिळून किमान एक तरी महापालिका जिंकून दाखवावी, केवळ तोंडाच्या वाफा घालवून काही होत नाही, अशी टीका भाजपा नेते, मंत्री गिरीश महाजनांनी केली आहे. त्यामुळे त्यांच्या या टीकेला खासदार संजय राऊत यांनी प्रत्युत्तर दिले आहे. राऊतांकडून महाजनांनी आमच्या नादाला लागू नये, अन्यथा… असा इशाराच देण्यात आला आहे.
शनिवारी (ता. 16 ऑगस्ट) प्रसार माध्यमांशी शिवसेना ठाकर गटाचे खासदार संजय राऊत यांनी संवाद साधला. यावेळी त्यांनी गिरिश महाजन यांनी मनसे ठाकरे गटाच्या युतीबाबत केलेल्या टीकेला प्रत्युत्तर देत म्हटले की, गिरीश महाजन म्हणजे महर्षी व्यास नाही. त्यांनी काहीही बोलावे, काहीही करावे, असे नाही. त्यांनी सर्वात पहिल्यांदा स्वतःच्या खाली काय जळत आहे, ते पाहावे. ज्या दिवशी त्यांच्याकडे सत्ता नसेल, त्या दिवशी त्यांची काय अवस्था असेल, त्यादिवशी ते कुठे असतील? याचा त्यांनी विचार करावा. तोंडाच्या वाफा कोण दवडंतय आणि कोण नाही हे उद्या ठाकरे बंधूंचे राजकीयदृष्ट्या एकत्र झाल्यावर त्यांना कळेल. पण त्यामुळे यांना रस्त्यावर फिरणे कठीण होईल. फडणवीसांचे हे जे चोर, लफंगे, दरोडेखोर यांना रस्त्यावर फिरणे मुश्किल होईल, असा टोला राऊतांनी लगावला.
तसेच, मी गिरीश महाजन यांना खास सांगू इच्छितो असे म्हणत राऊत म्हणाले की, आज तुमची जी मस्ती आहे ती लुटलेल्या पैशांची मस्ती आहे. मिस्टर महाजन ही तुमची सत्तेची मस्ती आहे. तुम्ही असे समजू नका की तुम्ही म्हणजे प्रमोद महाजन. तर असे नाही, तुम्ही जामनेरचे गिरीश महाजन आहात. तुम्ही कोण आहात? याचे तुम्ही आत्मचिंतन करा आणि तुमचे काय धंदे आहेत, याचेही आत्मचिंतन करावे. मग तुम्ही बाळासाहेब ठाकरेंच्या ठाकरे कुटुंबावर बोला. फार आमच्या नादाला लागू नका. थोडक्यात सध्या तुम्ही बचावलेले आहात, मंत्री गिरीश महाजन यांनाअसा इशाराच यावेळी खासदार संजय राऊत यांनी दिला आहे. त्यामुळे आता राऊतांच्या या इशाऱ्याला गिरीश महाजन काय उत्तर देतात, हे पाहणे महत्त्वाचे ठरणार आहे.
