सोमवारी सकाळपासून राज्यात मान्सून दाखल झाल्यानंतर मुंबईत मुसळधार (Mumbai Rain)पावसाला सुरुवात झाली आहे. मुंबईला यलो अलर्ट हवामान खात्याने दिला असून काही तास मुंबईत मुसळधार पाऊस आणि जोरदार वारे वाहतील, असा इशारा दिला होता. त्यानुसार मुंबई शहर आणि उपनगरात सध्या जोरदार पाऊस सुरु आहे.समुद्राला सकाळी 11 वाजून 24 मिनिटांनी भरती येणार आहे. यापेक्षा समुद्रात मोठ्या लाटा उसळताना दिसतील. समुद्राला भरती आल्यानंतर मुंबईतील पाण्याचा निचरा होणे बंद होते. मुंबईतील सखल भाग आणि रेल्वे ट्रॅकवर गेल्या काही तासांमधील पावसामुळे आताच पाणी साचले आहे. आता समुद्राला भरती आल्यास पाण्याचा निचरा बंद होऊन मुंबईत आणखी पाणी तुंबण्याची शक्यता आहे.
माटुंगा, मस्जिद बंदर या रेल्वे स्थानकांमध्ये पावसाचे पाणी साचले आहे. मस्जिद बंदर रेल्वे स्थानकात साचलेले पाणी आता फलटाच्या उंचीच्या जवळपास पोहोचल्याने येथील वाहतूक कधीही ठप्प होण्याची शक्यता आहे. 20 ते 25 मिनिटे उशिराने सध्या मध्य आणि हार्बर रेल्वेची वाहतूक सुरु आहे. त्यामुळे सकाळच्या वेळेत कार्यालयात जाण्यासाठी निघालेल्या चाकरमान्यांना मनस्ताप सहन करावा लागत आहे. तर जोरदार पावसामुळे पश्चिम द्रुतगती महामार्गावरही प्रचंड वाहतूक कोंडी पाहायला मिळत आहे. तर पूर्व द्रुतगती महार्गावर आणि एलबीएस मार्गावर भांडूप, कांजूर आणि सायन परिसरात वाहतूक कोंडी झाली आहे.
Mumbai Rain मुंबई महानगरपालिका युद्धपातळीवर कामाला लागली
मुंबईत सुरु असलेल्या जोरदार पावसामुळे पाणी साचायला सुरुवात झाली आहे. मुंबई महानगरपालिकेने या पार्श्वभूमीवर एक पोस्ट शेअर केली आहे. त्यामध्ये म्हटले आहे की, बृहन्मुंबई महानगरपालिकेच्या घनकचरा व्यवस्थापन तसेच इतर अत्यावश्यक सेवा देणाऱ्या विविध विभागातील अधिकारी मुंबईत सुरू असलेल्या जोरदार पावसाच्या पार्श्वभूमीवर, व कर्मचारी प्रत्यक्ष क्षेत्रावर (on ground) कार्यरत आहेत. पावसाच्या पाण्यासोबत वाहून येणारा कचरा मनुष्य प्रवेशिका (मॅनहोल) किंवा नाल्यांमध्ये अडकून अडथळा निर्माण होऊ नये, यासाठी स्वच्छता कर्मचारी ठिकठिकाणी अथकपणे कार्यरत राहून सेवा बजावत आहेत. तसेच, भर पावसातही परिसर स्वच्छ राहावा, दुर्गंधी पसरू नये आणि मुंबईकरांना त्रास होऊ नये, यासाठी बृहन्मुंबई महानगरपालिकेचे कर्मचारी प्रयत्नांची पराकाष्ठा करत आहेत.
Mumbai Rain महापालिकेच्या आपत्ती व्यवस्थापन कक्षाची तत्काळ कार्यवाही
मुंबईत झालेल्या पावसामुळे काही भागांमध्ये पाणी साचल्याची स्थिती निर्माण झाली आहे. मुंबई महानगरपालिकेच्या आपत्ती व्यवस्थापन कक्षाने यासंदर्भात तात्काळ कार्यवाही सुरू केली आहे. मोठ्या प्रमाणावर ज्या ठिकाणी पाणी साचले आहे, पाणी काढण्याच्या सूचना त्या भागांबाबत संबंधित वॉर्ड कार्यालयांशी संपर्क साधूनदेण्यात येत आहेत. महापालिकेची यंत्रणा सकाळपासूनच कामाला लागली असून, पाणी उपसा व वाहतूक सुरळीत ठेवण्यासाठी प्रयत्न सुरू आहेत.
