अहिल्यानगर जिल्ह्याला वरदान ठरलेल्या भंडारदरा (Bhandardara Dam) आणि मुळा पाणलोटात मंगळवारपासून पावसाचा जोर वाढला आहे. परिणामी भंडारदरा धरण बुधवारी ओव्हर फ्लो झाले. दरम्यान भंडारदरा धरणातून 20 हजार 763 क्युसेकने विसर्ग सुरू आहे. तर नवीन पाण्याची आवक मोठ्या प्रमाणात निळवंडे धरणात होत असुन धरणातील पाणी पातळी नियंत्रित ठेवण्यासाठी जलसंपदा विभागाचे अभियंता प्रविण भांगरे यांनी 8 हजार 600 क्युसेकने पाणी निळवंडे धरणातून सोडण्यात आल्याची माहिती दिली.
भंडारदरा धरण पाणलोट परिसरात गेल्या आठवड्यात पावसाने विश्रांती घेतल्यामुळे भंडारदरा धरण भरण्याचा विक्रम 15 ऑगस्टला मोडला होता. परंतु पावासाने सोमवार पासून भंडारदरा धरण पाणलोट क्षेत्रात दमदार हजेरी लावली. गेल्या दोन दिवसांपासून परिसरात मान्सून सक्रिय झाला आहे. डोंगरदर्‍या धुक्याने लेपाटून गेल्या असून धबधबे जोमाने वाहत असून छोट्या नद्या, नाले खळखळून धरणात विसावत आहेत.
धरणातून प्रवरा नदीपात्रात पाणी बुधवारी भंडारदरा धरण भरून ओव्हरफ्लो झाल्यानंतर सोडण्यात आले.तर दोन दिवसांपासून निळवंडे धरणांच्या पाणलोट क्षेत्रात जोरदार पावसाच्या सरी बरसत आहे एकूण 8 हजार 600 क्युसेकने निळवंडे धरणातून पाणी प्रवरा नदी पात्रात झेपावत आहे. त्यामुळे प्रवरा नदी वाहती झाली आहे. नवीन पाण्याची आवक निळंवडे धरणात वाढत असल्याने निळंवडे धरण लवकरच भरणार असल्याचे वर्तविले जत आहे.
