कल्याण (Kalyan), ठाणे (Thane) आणि डोंबिवली (Dombivali) परिसरातील मेट्रो १२ प्रकल्पाच्या कामामुळे कल्याण-शिळ (Kalyan Sheel) रोडवरील वाहतूक २० दिवस रात्रीच्या वेळी बंद ठेवण्यात येणार आहे. ११ ऑगस्ट ते २० ऑगस्टदरम्यान रात्री १२ ते पहाटे ४ वाजेपर्यंत मानपाडा चौक (Manpada) ते सोनारपाडा (Sonarpada) चौक या दरम्यान कल्याणच्या दिशेने जाणारी हलकी व जड वाहने थांबवली जातील. त्यानंतर २१ ते ३१ ऑगस्टदरम्यान शिळच्या दिशेने जाणाऱ्या वाहनांना सुयोग हॉटेल, रिजेन्सी अनंतम चौक या परिसरातून रात्री १२ ते पहाटे ४ वाजेपर्यंत प्रवेश मिळणार नाही.
हा निर्णय मेट्रो गर्डर बसवण्याचे काम सुरळीत पार पाडण्यासाठी आणि अपघात टाळण्यासाठी घेण्यात आला आहे. अत्यावश्यक सेवा जसे की पोलीस, रुग्णवाहिका आणि अग्निशमन दलाला मात्र सूट देण्यात आली आहे. पर्यायी मार्गांचा वापर अनिवार्य असून, प्रवाशांनी प्रवासाचे नियोजन आधीच करून ठेवावे, असा सल्ला वाहतूक पोलिसांनी दिला आहे. बंदीमुळे इतर प्रमुख रस्त्यांवर वाहतूक कोंडी वाढण्याची शक्यता असल्याने वाहनचालकांनी संयम ठेवावा, असेही आवाहन प्रशासनाकडून करण्यात आले आहे.
