कुणीही उठतो आणि उपदेश करतो. सर्व मक्ता मीच घेतला आहे. उपमुख्यमंत्री अजित पवार (Ajit Pawar) यांनी कुठून पुण्याचा पालकमंत्री झालो, असे वाटतो, अशी संतप्त प्रतिक्रिया व्यक्त केली आहे. पिंपरी चिंचवड शहरातून वाहणाऱ्या मुळा नदी सुशोभीकरणासाठी एक हजार झाडे तोडण्यात येणार आहेत. अजित पवार यांनी पालकमंत्री म्हणून ती तोडण्यापासून रोखावी, अशी मागणी पर्यावरणप्रेमींनी केली होती. त्यावर अजित पवार यांनी वरील प्रतिक्रिया दिली आहे. चिंचवड येथे अभिनेते सयाजी शिंदे यांच्या वाढदिवसानिमित्त आयोजित करण्यात आलेल्या अभिष्टचिंतन सोहळ्यात अजित पवार बोलत होते. यावेळी विधानसभा उपाध्यक्ष अण्णा बनसोडे, राष्ट्रवादी काँग्रेसचे ( अजित पवार ) प्रदेशाध्यक्ष सुनील तटकरे, महिला आयोगाच्या अध्यक्षा रूपाली चाकणकर आणि कार्यकर्ते उपस्थित होते.
यावेळाी अजित पवार यांचे भाषण संपताना सामाजिक कार्यकर्ते मारुती भापकर यांनी मुळा नदी येथे सुरू असलेली वृक्षतोड थांबवण्याची विनंती केली. ‘पवना, इंद्रायणी मुळा नदी सुशोभीकरणासाठी हजारो झाडांची वृक्षतोड करण्यात येणार आहे. दुर्गादेवी टेकडीवरील सुद्धा झाडे तोडली जाणार आहे. एमआयडीसी परिसरासह शहरात प्रचंड प्रमाणात वृक्षतोड सुरू आहे. अजित पवार तुम्ही पालकमंत्री आहात. शहरातील वृक्षतोड पालकमंत्री म्हणून थांबवावी,’ अजित पवार यांना अशी विनंती मारुती भापकर यांनी केली.
यावर अजित पवार म्हणाले, ‘हे सगळं ऐकल्यावर कुठून पुण्याचा पालकमंत्री झालो असे वाटायला लागले आहे. जो तो उठतो आणि मला उपदेश करतो. सगळा मक्ता मीच घेतला आहे. यांनी केवळ उपदेश करायचा.’ असे म्हणत अजित पवार यांनी वृक्ष तोडीवर भाष्य करणे टाळले. मराठवाडा विदर्भात वृक्षांची लागवड कमी आहे. त्यामुळे राज्य सरकारने वृक्ष लागवडीची मोहीम हाती घेतली आहे. यंदा राज्यात 10 कोटी झाडे लावण्यात येणार आहे. त्यातील एक कोटी झाडे बीड जिल्ह्यात लावण्यात येणार आहे. पाच वर्षात 100 कोटी वृक्ष लागवड पुढील चार वर्षे 25 कोटी, अशी करण्यात येणार आहे, असे अजित पवार यांनी सांगितले.
