भाविकांचे श्रध्दास्थान असलेले ओतूर येथील ग्रामदैवत, श्री कपर्दिकेश्वर पहिला श्रावणी सोमवार यात्रे निमित्त दि.२८ रोजी हजारो भाविकांनी कपर्दिकेश्वर मंदिरात शिवलींगावर तयार करण्यात आलेल्या कोरड्या तांदळाच्या कलात्मक पिंडीचे व जगद्गुरू संत तुकाराम महाराजांचे गुरू श्री बाबाजी चैतन्य महाराजांच्या संजीवन समाधीचे सोमवारी पहाटे पासून रात्री उशिरापर्यंत दर्शन घेतले.
ओतूर ( ता.जुन्नर ) येथे दरवर्षी श्रावण महिन्यात श्री कपर्दिकेश्वर मंदिरात शिवलिंगावर कोरड्या तांदळाच्या कलात्मक पिंडी तयार करण्यात येतात,पिंडींचे दर्शन घेण्यासाठी महाराष्ट्राच्या कानाकोपऱ्यातून भाविक भक्त दरवर्षी ओतूरला येतात.
पहिल्या श्रावणी सोमवार निमित्त श्री कपर्दिकेश्वर मंदिरात शिवलिंगावर तांदळाची एक कलात्मक पिंड तयार करण्यात आली होती.पहाटे सहा वाजता विलास मारूती डुंबरे यांच्याहस्ते सपत्नीक महाअभिषेक,आरती करण्यात आली.
त्यानंतर मंदिर भाविकांना दर्शनासाठी खुले करण्यात आले. यावेळी श्री कपर्दिकेश्वर देव-धर्म संस्थेचे अध्यक्ष अनिल तांबे,सचिव महेंद्र ( गांधी ) पानसरे,विघ्नहर सहकारी कारखान्याचे संचालक धनंजय डुंबरे,श्रीधर भालेराव सर,पांडुरंग ढोबळे,प्रकाश तांबे,विलास पानसरे,सागर दाते,सचिन तांबे, अमोल काका डुंबरे, श्रेयस डुंबरे, पांडुरंग ताजणे, प्रसाद डुंबरे,पुजारी गोविंद डुंबरे, सागर घोडेकर.आदी ग्रामस्थ,भाविक व कपर्दिकेश्वर देव-धर्म संस्थेचे पदाधिकारी उपस्थित होते.
पहिल्या श्रावणी सोमवार निमित्त “श्रावण सरी” भावगीतांचा कार्यक्रम संपन्न झाला.महाराष्ट्रातील सुप्रसिद्ध गायक श्रीहरी मेदनकर सर व त्यांच्या ग्रुपने सुमधुर भक्ती गीते भावगीते सादर केली. या कार्यक्रमाचे उद्घाटक उद्योजक जयवंत डुंबरे यांच्या हस्ते करण्यात आले.
सकाळी ८ ते ११ वाजता शालेय दिंडी महोत्सव व दुपारी १२ ते ६ वाजता वारकरी भजन महोत्सवाचे श्री कपर्दिकेश्वर देव-धर्म संस्थेच्या वतीने आयोजन करण्यात आले होते. दिंडी महोत्सवामध्ये ओतूर आणि परिसरातील प्राथमिक व माध्यमिक शाळांच्या दिंड्यां सहभागी झाल्या होत्या. श्री कपर्दिकेश्वर देवधर्म संस्थेच्या वतीने सर्व दिंड्यांचे स्वागत करण्यात आले.
बाल वारकऱ्यांना पांडुरंग ताजणे यांनी केळी प्रसाद वाटप केला. तसेच अनिल ढमाले आणि त्यांच्या सर्व ढमाले मित्रपरिवार यांनी शंभर किलो खिचडी प्रसादाचे भाविकांना वाटप केले. तसेच श्री कपर्दिकेश्वर मंदिर परिसरात स्थापना करण्यात आलेल्या बारा ज्योतिर्लिंग दर्शनाचा भाविकांनी लाभ घेतला. ओतूर पोलीस स्टेशनचे सहाय्यक पोलीस निरीक्षक एल.जी.थाटे यांनी मंदिर परिसरात पोलिसांचा चोख बंदोबस्त ठेवला होता.
