बॉलिवूडमधील #MeToo चळवळीला भारतात सुरुवात करणाऱ्या अभिनेत्री तनुश्री दत्ताने पुन्हा एकदा एक भावनिक आणि धक्कादायक खुलासा केला आहे. इंस्टाग्रामवर तिने एक व्हिडिओ पोस्ट केला असून, या व्हिडिओमध्ये ती अश्रूंनी भरलेल्या डोळ्यांनी सांगते की गेल्या चार ते पाच वर्षांपासून ती स्वतःच्या घरात मानसिक आणि शारीरिक त्रासाला सामोरी जात आहे.
या व्हिडिओमध्ये तनुश्री स्पष्टपणे सांगते की, तिच्या सहनशक्तीचा अंत झालाय. “मी खूप त्रासले आहे. मी आजारी आहे, माझं करिअर थांबलं आहे. मी काम करु शकत नाही. पोलिसांना मदतीसाठी फोन केला, ते घरी आले आणि मला सांगितलं की पोलीस स्टेशनमध्ये येऊन सविस्तर तक्रार द्या. पण या सर्व गोष्टी खूप वर्षांपासून चालत आहेत. माझं आयुष्य उद्ध्वस्त झालं आहे.” असं ती व्यथित स्वरात म्हणते.
विशेष म्हणजे, या संपूर्ण व्हिडिओमध्ये तिने कोणत्याही व्यक्तीचं नाव घेतलेलं नाही. त्यामुळे ती नेमकी कोणाच्या विरोधात बोलत आहे, याबाबत सध्या गूढ निर्माण झालं आहे.
तनुश्री दत्ताचा जन्म 19 मार्च 1984 रोजी झारखंडमधील जमशेदपूर येथे एका बंगाली हिंदू कुटुंबात झाला. 2004 मध्ये फेमिना मिस इंडिया युनिव्हर्सचा किताब पटकावल्यानंतर ती मिस युनिव्हर्स स्पर्धेत टॉप 10 मध्ये पोहोचली होती. या यशानंतर ती बॉलिवूडमध्ये आली आणि अनेक चित्रपटांमध्ये झळकली.
तिच्या प्रमुख चित्रपटांमध्ये आशिक बनाया आपने, चॉकलेट, ढोल, भागम भाग, रिस्क, 36 चायना टाउन, अपार्टमेंट यांचा समावेश होतो. तिच्या सौंदर्यामुळे आणि आत्मविश्वासामुळे ती अल्पावधीतच चर्चेत आली होती.
2018 मध्ये तनुश्रीने एक मोठा धक्का दिला होता जेव्हा तिने #MeToo मोहिमेंतर्गत हॉर्न ओके प्लीज (2008) या चित्रपटाच्या सेटवर अभिनेता नाना पाटेकर आणि कोरिओग्राफर गणेश आचार्य यांच्यावर गैरवर्तनाचे आरोप केले. या प्रकरणामुळे बॉलिवूडमध्ये खळबळ उडाली होती. तनुश्रीने स्पष्ट केलं होतं की, तिला अश्लील नृत्य करण्यासाठी जबरदस्ती केली गेली, जे तिच्या करारात नव्हतं. त्यामुळे ती अस्वस्थ झाली होती आणि शूटिंग सोडून दिलं होतं.
सध्या सोशल मीडियावर तिचा व्हिडिओ व्हायरल झाला असून अनेक कलाकार आणि चाहत्यांनी तिच्या समर्थनार्थ कमेंट्स केल्या आहेत. मात्र अद्यापही कोणतीही ठोस मदत किंवा प्रशासनाकडून खुलासा झालेला नाही.
तनुश्री दत्ताचा हा संघर्ष पुन्हा एकदा मनोरंजनसृष्टीतील अंधार दाखवतोय. तिच्या या भावनिक सादेमुळे समाजात चर्चेला पुन्हा एकदा वाव मिळालाय – ‘एका कलाकाराच्या घरातच जर सुरक्षितता नसेल, तर ती कुठे असेल?’ हा प्रश्न सगळ्यांना अस्वस्थ करत आहे.
