भाजी बाजारात फेरफटका मारताना अनेक रंगबिरंगी आणि पोषणमूल्यांनी भरलेल्या भाज्या दिसतात. मात्र या सर्व भाज्यांमध्ये एक अशी भाजी आहे जी ‘सुपरफूड’ म्हणून ओळखली जाते – ती म्हणजे शेवग्याची भाजी. सामान्य वाटणारी ही भाजी खरंतर पोषणतत्त्वांचा खजिना आहे.
शेवगा – सहज उपलब्ध, पण शक्तिशाली
शेवग्याच्या शेंगा कोणत्याही भाजी बाजारात सहज सापडतात. पण तुम्हाला माहिती आहे का की या शेंगांमध्ये इतकी पोषणमूल्ये असतात की ती महागड्या सप्लिमेंट्सचा पर्याय ठरू शकतात? म्हणूनच आंतरराष्ट्रीय आरोग्य संस्थाही शेवग्याला सुपरफूड म्हणून मान्यता देतात.
शाकाहारींसाठी पौष्टिकतेचा खजिना
शेवग्याच्या शेंगांमध्ये आणि पानांमध्ये भरपूर प्रमाणात प्रोटीन, लोह, आणि कॅल्शियम असते. विशेषतः जे शाकाहारी आहेत, त्यांच्यासाठी शेवगा एक नैसर्गिक आणि आरोग्यदायी पर्याय आहे.
रोगप्रतिकारक शक्ती वाढवतो
या भाजीमध्ये व्हिटॅमिन A, C, आणि अँटीऑक्सिडंट्स आढळतात, जे शरीरातील रोगप्रतिकारक शक्ती वाढवण्यास मदत करतात. बदलत्या हवामानात वारंवार सर्दी-खोकल्याचा त्रास होणाऱ्यांसाठी शेवग्याचे सेवन लाभदायक ठरते.
मधुमेहावर नैसर्गिक उपाय
शेवग्याच्या शेंगांमधील घटक शरीरातील ब्लड शुगर नियंत्रित ठेवण्यास मदत करतात. त्यामुळे मधुमेह असणाऱ्यांसाठी ही भाजी म्हणजे एक नैसर्गिक वरदान आहे.
पचनक्रियेसाठी उपयुक्त
शेवग्यातील फायबरच्या भरपूर प्रमाणामुळे अपचन, बद्धकोष्ठता अशा समस्यांवर शेवग्याचे सेवन फायदेशीर ठरते. नियमित सेवनामुळे पचनक्रिया सुधारते आणि पोट हलके वाटते.
हाडे मजबूत करण्यासाठी प्रभावी
शेवग्यात कॅल्शियम आणि फॉस्फरस मुबलक प्रमाणात असते. त्यामुळे हाडांना बळकटी मिळते आणि सांध्यांचे आरोग्य सुधारते. वृद्ध वयात हाडांच्या तक्रारी टाळण्यासाठी शेवग्याचे सेवन उपयुक्त आहे.
शेवग्याचे इतर उपयोग
त्वचेचे आरोग्य: शेवग्यातील अँटीऑक्सिडंट्स त्वचा निरोगी ठेवतात, वृद्धत्वाची चिन्हे कमी करतात.
केसांचे पोषण: शेवग्याच्या तेलाचा वापर केसांना मजबुती देतो आणि कोरडेपणा कमी करतो.
वजन कमी करण्यास मदत: कमी कॅलोरी आणि जास्त फायबरमुळे शेवगा वजन नियंत्रणात ठेवतो.
