दिग्दर्शक कबीर खान (Kabir khan) यांनी नुकत्याच झालेल्या एका कार्यक्रमात ‘बजरंगी भाईजान’ (Bajrangi Bhaijaan)बाबतचा एक कमी ज्ञात किस्सा उलगडला. या चित्रपटात सलमान खानने (Salman Khan) एका हिंदू व्यक्तीची भूमिका साकारत, हरवलेल्या पाकिस्तानी मुलीला तिच्या घरी पोहोचवण्याचा प्रवास दाखवला आहे. या प्रवासात त्याला अनेक अडचणी आणि मदतीच्या घटना घडतात.
कबीर खान यांनी सांगितले की, चित्रपटातील एका दृश्यात ओम पुरी (Om puri)‘जय श्री राम’ म्हणतात. मात्र, सेंसॉर बोर्डाने मुस्लिम समाजाच्या भावना दुखावू नयेत म्हणून हा संवाद काढून टाकण्याची सूचना केली. कबीर खान यांनी याला विरोध करत, स्वतः मुस्लिम असूनही त्यांना याबाबत काहीच अडचण नसल्याचे सांगितले. त्यांनी दिल्लीतील आपल्या बालपणीचा उल्लेख करत सांगितले की, तिथे ‘जय श्री राम’ हा राजकीय घोष नसून लोकांमध्ये ‘हॅलो’ किंवा ‘बाय’ म्हणण्यासारखा साधा संबोधन होता. अखेर कबीर खान यांनी आपला निर्णय कायम ठेवला.
‘बजरंगी भाईजान’मध्ये सलमान खान आणि करीना कपूर यांनी मुख्य भूमिका साकारली होती. चित्रपटाने प्रेक्षकांचे मन जिंकले, गाणीही लोकप्रिय झाली आणि बॉक्स ऑफिसवरही मोठी कमाई केली.
