जगप्रसिद्ध उद्योजक एलॉन मस्क यांच्या टेस्ला कंपनीने अखेर भारतात अधिकृत प्रवेश केला आहे. 15 जुलै रोजी मुंबईच्या वांद्रे-कुर्ला कॉम्प्लेक्स (BKC) येथील अत्याधुनिक आणि पॉश भागात टेस्लाच्या पहिल्या शोरूमचे उद्घाटन मुख्यमंत्री देवेंद्र फडणवीस आणि परिवहन मंत्री प्रताप सरनाईक यांच्या हस्ते पार पडणार आहे. विशेष बाब म्हणजे, या शोरूमच्या प्रवेशद्वारावर टेस्लाची नावफलक (बोर्ड) मराठी भाषेत लावण्यात आली आहे – ही बाब राज्य सरकारच्या नियमांचे काटेकोर पालन आणि स्थानिक संस्कृतीबद्दलचा आदर दाखवते.
सुमारे 4000 स्क्वेअर फूटच्या भव्य जागेवर उभ्या राहिलेल्या या शोरूमसाठी टेस्लाने 5 वर्षांचा लीज करार केला आहे. दर महिन्याचं भाडं जवळपास 35.26 लाख रुपये असून, पुढील पाच वर्षांमध्ये त्यात प्रत्येक वर्षी 5% वाढ होणार आहे. यामुळे शेवटच्या वर्षात मासिक भाडं 43 लाख रुपयांपर्यंत जाऊ शकतं.
शोरूममध्ये टेस्लाचे मॉडेल 3, मॉडेल Y, आणि मॉडेल X यांपैकी काही मॉडेल्स सादर केले जाणार असल्याची शक्यता आहे. सुरुवातीला मॉडेल Y ही इलेक्ट्रिक SUV कार भारतात सादर होणार असल्याचं जवळपास निश्चित मानलं जात आहे. ही कार चीनमधून आयात होणार असल्यामुळे, यावर 70% आयात शुल्क लागणार आहे, ज्यामुळे तिची किंमत भारतात तुलनेने जास्त असेल. मात्र भविष्यात स्थानिक उत्पादनाची शक्यता असून, त्याद्वारे किंमतीत घट होण्याची शक्यता वर्तवली जात आहे.
मॉडेल Y ही कार 574 किमीची रेंज देते आणि फक्त 4.6 सेकंदांत 0 ते 100 किमी प्रतितास वेग गाठते. ही SUV दोन व्हेरिएंटमध्ये उपलब्ध आहे – Long Range RWD आणि AWD Dual Motor. दुसरीकडे, मॉडेल 3 मध्येही अनेक दमदार फीचर्स असून ती फक्त 3 सेकंदांत 0 ते 100 किमी प्रतितास वेग पकडते. अमेरिकेत याची किंमत $29,990 असून, भारतात तिची किंमत सुमारे 29.79 लाख रुपये असू शकते.
टेस्लाच्या भारतात येण्यामुळे देशातील इलेक्ट्रिक वाहन क्षेत्राला नवा आयाम मिळाला आहे. पर्यावरणपूरक वाहतूक, अत्याधुनिक तंत्रज्ञान, आणि स्टायलिश डिझाईन यांचा संगम असलेली ही कंपनी भारतीय ग्राहकांसाठी आकर्षण ठरणार आहे. उद्योग विश्लेषकांच्या मते, टेस्लाच्या आगमनामुळे भारतात ईव्ही स्पर्धा तीव्र होईल आणि तंत्रज्ञानाची नवीन क्रांती घडेल.
