मराठी चित्रपटसृष्टीतील लोकप्रिय आणि हृदयाच्या अगदी जवळची जोडी म्हणजे अशोक सराफ आणि निवेदिता सराफ. त्यांच्या प्रेमकहाणीबद्दल अनेकांनी ऐकलं आहे, पण त्यांच्या लग्नाची कहाणी थोड्या वेगळ्याच वळणाने रंगलेली आहे – आणि ती फार कमी लोकांना माहीत आहे. खुद्द अशोक सराफ यांनीच त्यांच्या आत्मचरित्र ‘मी बहुरुपी’ मध्ये ही खास आठवण सांगितली आहे.
एप्रिल 1987 मध्ये अशोक सराफ यांचा एक भयानक अपघात झाला होता. त्या अपघातात त्यांचा जीव वाचणं हेच एक प्रकारचं चमत्कार वाटावं अशीच ती घटना होती. त्या प्रसंगानंतर त्यांच्या आणि निवेदिताच्या आयुष्यात एक नवा वळण आला. दीड-दोन वर्षांनी, म्हणजे 27 जून 1989 रोजी, अशोक सराफ विवाहबंधनात अडकले. हे लग्न साधं, छोटं पण खूप खास होतं. गोव्यातील मंगेशी देवस्थान हे सराफ कुटुंबाचं कुलदैवत असल्याने, त्यांच्या आईची आणि स्वत: अशोक सराफांचीही इच्छा होती की लग्न याच ठिकाणी व्हावं – आणि तसंच झालं.
वेळ खूपच कमी होता, त्यामुळे विशेष घाईघाईने पण जिवलग मित्र आणि नातेवाईकांच्या उपस्थितीतच या लग्नाचा समारंभ पार पडला. या खास दिवशी अभिनेता सचिन पिळगांवकर, विनोदी कलाकार मच्छिंद्र कांबळी, दिग्दर्शक गिरीश घाणेकर, लक्ष्मीकांत बेर्डे आणि त्यांची पत्नी रुही, तसेच अजय सरपोतदार आणि वर्षा उसगांवकर यांचे आईवडील उपस्थित होते. दुर्दैवाने अशोक सराफ यांचे वडील आजारी असल्यामुळे उपस्थित राहू शकले नाहीत, म्हणून त्यांचे मावसभाऊ जयमराम खवटे यांनी विवाह विधी पूर्ण केले. निवेदिता यांचे मामा-मामी यांनी कन्यादान केले.
लग्नानंतर काही महिन्यांतच त्यांच्या संसारात नव्या आनंदाची चाहूल लागली. निवेदिता यांना अनिकेत नावाचा एक गोंडस मुलगा झाला. त्या काळात “आमच्यासारखे आम्हीच” या चित्रपटाचं डबिंग सुरू होतं, आणि निवेदिता आई बनली होत्या. त्यामुळे त्या चित्रपटातील निवेदिताचा डबिंग त्यांची बहीण मीनल यांनी केलं. विशेष म्हणजे, निवेदिता, मीनल आणि त्यांची आई यांचा आवाज इतका हुबेहूब आहे की, फोनवरही ओळखणं कठीण होतं, असं खास नमूद करत अशोक सराफ यांनी त्यांच्या आयुष्यातील हे सुंदर क्षण लिहून ठेवले आहेत.
