महाराष्ट्रातील सातारा जिल्ह्यातील वाई (Wai) तालुका, हा केवळ ऐतिहासिक किंवा धार्मिक दृष्टिकोनातून महत्त्वाचा नाही, तर बॉलिवूडसाठीही तो एक अत्यंत प्रिय आणि महत्त्वाचा चित्रिकरण स्थळ आहे. सह्याद्रीच्या कुशीत वसलेल्या या निसर्गसंपन्न गावाने आपल्या शांततेमुळे, हिरवाईने आणि पारंपरिक रचनेने हिंदी सिनेसृष्टीत एक वेगळीच ओळख निर्माण केली आहे.
बॉलिवूडच्या अनेक सुपरहिट चित्रपटांचं छायाचित्रण वाईमध्येच
वाईमध्ये आजवर अनेक प्रसिद्ध हिंदी चित्रपटांचं शूटिंग झालं आहे. ज्यात “जिस देश में गंगा रहता है”, “स्वदेस (Swades)”, “गंगाजल (Gangajal)”, “ओमकारा (Omkara)”, “दबंग (Dabangg)” आणि “दबंग 2 ( Dabangg 2)”, “इश्किया (Ishqiya)”, “सिंघम (Singham)”, “बोल बच्चन (Bol Bachchan)”, “जिला गाजियाबाद ( Zila Ghaziabad)” अशा चित्रपटांचा समावेश आहे. विशेष म्हणजे, यातील बहुतांश चित्रपट ग्रामीण पार्श्वभूमी असलेल्या कथा मांडतात, जे वाईच्या स्थानिक सौंदर्यात अगदी सहज मिसळतात.
2004 साली प्रदर्शित झालेला शाहरुख खानचा (Shah Rukh Khan) ‘स्वदेस’ हा चित्रपट वाईमधील एका गावात शूट झाला होता. या चित्रपटासाठी संपूर्ण टीम तब्बल सात महिने वाईत मुक्कामी होती. “ये तारा, वो तारा” हे गाणं आणि पंचायतीचं गाभा दृश्य, या दोन्ही प्रसंगांमुळे वाईचं नाव सिनेरसिकांच्या मनात कोरलं गेलं.
सलमान खानचा ‘दबंग’ चित्रपटातील लोकप्रिय गाणं ‘हुड हुड दबंग’ हे वाईतील प्रसिद्ध मंदिर परिसरात चित्रित करण्यात आलं होतं. तर रोहित शेट्टी दिग्दर्शित ‘चेन्नई एक्सप्रेस’मधील काही महत्त्वाची दृश्ये, विशेषतः शाहरुख-दीपिकामधील संघर्ष प्रसंग, वाईमध्येच चित्रीत झाले आहेत.
शाहिद कपूर आणि सोनाक्षी सिन्हा यांच्या ‘आर… राजकुमार’मधील ‘मत मारी’ हे गाणं वाईच्या मुख्य भाजी मार्केटमध्ये शूट करण्यात आलं होतं. त्या प्रसंगी स्थानिक नागरिकांचा देखील सहभाग होता. सामान्य खरेदी करणाऱ्या लोकांमध्ये मिसळलेल्या जूनियर आर्टिस्ट्समुळे शूटिंगला रंगत आली होती. दिग्दर्शक प्रभुदेवा देखील त्या दृश्यांमध्ये उपस्थित होते.
‘छावा’ने पुन्हा वाईचं नाव चर्चेत आणलं
अलीकडेच चर्चेत आलेला ‘छत्रपती संभाजी महाराज’ यांच्यावर आधारित विक्की कौशलचा ‘छावा’ या चित्रपटाचं काही भाग वाईमध्ये शूट झाल्याने वाई पुन्हा एकदा चर्चेत आली. या ऐतिहासिक चित्रपटामुळे वाईतील अनेक ठिकाणे पर्यटकांमध्ये अधिक प्रसिद्ध झाली आहेत.
वाईमध्ये अनेक प्राचीन आणि सुंदर मंदिरे आहेत, जी केवळ धार्मिक महत्त्वाची नाहीत, तर चित्रपटांसाठीही उत्तम लोकेशन्स ठरतात. ब्राह्मणशाही घाटाजवळील चक्रेश्वर, चिम्नेश्वर, कौंतेश्वर (हरिहरेश्वर) आणि कालेश्वर ही मंदिरे, तसेच गोवर्धन संस्थेजवळील कृष्ण मंदिर, विठ्ठल मंदिर आणि गणपती मंदिर अशा ठिकाणी वारंवार शूटिंग केलं जातं.
चित्रपटांमुळे वाईला केवळ बॉलिवूडचं नव्हे तर पर्यटनाचं केंद्रस्थान देखील मिळालं आहे. अनेक फोटोशूट्स, टीव्ही सिरियल्स, मराठी चित्रपट, संगीत व्हिडिओ इथं शूट होत असतात. इथलं हवामान, शांत परिसर आणि सहज उपलब्ध होणाऱ्या पारंपरिक लोकेशन्समुळे दिग्दर्शक व निर्मात्यांची ही पहिली पसंती ठरली आहे.
