लग्न ठरलंय? किंवा नव्याने मंगळसूत्र घेण्याचा विचार करताय? मग हे ठरवणं महत्त्वाचं ठरतं की कोणत्या प्रकारचं मंगळसूत्र तुमच्यासाठी योग्य आहे. केवळ सौंदर्यापुरतं नव्हे, तर वापर, डिझाइन, मेटल, बजेट, टिकाऊपणा आणि वैयक्तिक गरजांनुसार मंगळसूत्र निवडणं अधिक आवश्यक ठरतं. खाली दिलेल्या टिप्स तुमच्या मंगळसूत्र खरेदीला अधिक स्मार्ट आणि योग्य बनवू शकतात.
- सर्वात आधी ठरवा बजेट आणि वापर
मंगळसूत्र खरेदी करताना सर्वात आधी तुमचं बजेट ठरवा. दररोज वापरणार असाल तर डिझाईन साधं, हलकं आणि टिकाऊ असावं. विशेष प्रसंगांसाठी जड डिझाईन चालेल. बजेट आधी ठरवल्यास दागिन्यांच्या निवडीत गोंधळ होत नाही आणि खरेदी सोपी होते.
- मेटलचा पर्याय फक्त ‘सोना’ मर्यादित नाही
आजकाल मंगळसूत्र सोन्यापुरतं मर्यादित राहिलेलं नाही. आता व्हाईट गोल्ड, प्लॅटिनम, हिऱ्याचं मेटल किंवा गोल्ड विथ डायमंड सेटिंग असे पर्याय सहज उपलब्ध आहेत. तुमच्या त्वचेला सूट होणारा, तुमच्या लूकशी जुळणारा आणि रोजच्या वापरात आरामदायक ठरेल असा मेटल प्रकार निवडा.
- लांबी तुमच्या वापरानुसार ठरवा
जास्त लांब मंगळसूत्र रोजच्या वापरात अडथळा ठरू शकतं. स्वयंपाक किंवा घरातील काम करताना ते कपड्यांमध्ये अडकण्याची शक्यता असते. म्हणूनच, मध्यम लांबीचं किंवा गळ्याच्या जवळ बसणारं मंगळसूत्र रोजच्या वापरासाठी योग्य. विशेष प्रसंगांसाठी लांब, शोभिवंत मंगळसूत्र ठेवलं तरी चालेल.
- पेंडंट डिझाईनला द्या महत्त्व
पेंडंट हे मंगळसूत्राचं सौंदर्य ठरवतं. तुम्ही जाड मंगळसूत्र घेणार असाल तरी पेंडंट हलकं आणि आरामदायक असावं, जे गळ्यावर सहज बसेल. पार्टीसाठी जरा मोठं आणि उठावदार डिझाईन चालेल, पण रोजच्या वापरासाठी सिंपल, क्लासिक आणि टिकाऊ डिझाईन उत्तम.
- मॅचिंग सेटचा विचार करा
तुमच्याकडे आधीच एखादं मॅचिंग इयरिंग्स, चेन किंवा बांगड्याचं सेट असेल, तर मंगळसूत्राची डिझाईन त्याच्याशी मॅच होते का? हे पाहा. मॅचिंग असल्यास लूक अधिक परिपूर्ण दिसतो आणि वेगळी खरेदी करण्याचा त्रासही वाचतो.
- हॉलमार्क – गुणवत्तेची खात्री
कितीही सुंदर आणि महागडं मंगळसूत्र का असेना, ते हॉलमार्क असलेलं असणं अत्यंत गरजेचं आहे. हॉलमार्क म्हणजे त्या दागिन्याचं शुद्धतेचं प्रमाणपत्र. भविष्यात विक्री किंवा बदल करताना ते अधिक विश्वासार्ह ठरतं.
