बॉलिवूड अभिनेत्री बिपाशा बासूचा (Bipasha Basu) एक व्हिडीओ अलीकडे सोशल मीडियावर झपाट्याने व्हायरल झाला, ज्यामध्ये तिच्या रूपामध्ये झालेला बदल सहज जाणवतो. आई झाल्यानंतर तिचं वजन वाढलेलं असून तिच्या शरीरात नैसर्गिक बदल दिसून येतात. मात्र, काही लोकांनी या बदलांवर टीका करत सोशल मीडियावर तिला ट्रोल करण्यास सुरुवात केली. पण बिपाशा बासूने यावर मौन न बाळगता ट्रोल करणाऱ्यांना थेट आणि ठाम उत्तर दिलं. इंस्टाग्रामवर ब्युटी इन्फ्लुएंसर आणि फॉर्मर मिस इंडिया श्वेता विजय नायर हिने एक व्हिडीओ शेअर करत आई झाल्यानंतर महिलांच्या शरीरात होणाऱ्या नैसर्गिक बदलांबद्दल स्पष्ट मत मांडलं. या व्हिडीओमध्ये बिपाशावर होणाऱ्या ट्रोलिंगचा निषेध करत महिलांना शरीरावर गर्व करण्याचा संदेश देण्यात आला होता.
“तुझ्या थेट आणि स्पष्ट शब्दांसाठी धन्यवाद. मला आशा आहे की लोक इतके उथळ राहणार नाहीत. महिला प्रत्येक दिवसात अनेक जबाबदाऱ्या पार पाडतात. त्यांना प्रोत्साहन हवे, टीका नव्हे. मी एक आत्मविश्वासू स्त्री आहे – माझ्या आयुष्यात एक प्रेमळ जोडीदार, एक आधार देणारे कुटुंब आहे.” “माझं आयुष्य मीम्स आणि ट्रोल्समुळे परिभाषित होत नाही. मात्र ही एक चिंताजनक सामाजिक मानसिकता आहे. एखादी दुसरी स्त्री या वागणुकीमुळे खचून जाईल. त्यामुळे महिलांनी महिलांसाठी आवाज उठवणं गरजेचं आहे. अशा एकमेकींना आधार देणाऱ्या स्त्रियांनीच समाजाला दिशा दिली पाहिजे.” या सशक्त भूमिकेला बिपाशाचा नवरा अभिनेता करण सिंग ग्रोव्हर यानेही पाठिंबा दर्शवला आहे. त्याने श्वेताचे आभार मानले. अभिनेत्री भूमी पेडणेकर हिने देखील या मुद्द्यावर सहमती दर्शवत बिपाशाला साथ दिली.
आई होणं ही स्त्रीच्या आयुष्यातील एक सुंदर आणि परिवर्तनशील प्रक्रिया असते. यामध्ये शरीरात होणारे बदल हे शारीरिकच नव्हे तर मानसिक पातळीवरही खोलवर परिणाम करणारे असतात. बिपाशासारख्या प्रसिद्ध महिलाही जर ट्रोलिंगचा सामना करत असतील, तर सामान्य स्त्रीची काय अवस्था होत असेल याचा विचार करणे आवश्यक आहे.
