सध्याच्या धावपळीच्या जीवनशैलीत नाश्त्यासाठी पटकन बनणारा पर्याय म्हणजे ब्रेड. सकाळी वेळेअभावी अनेक लोक ब्रेडवर भरवसा ठेवतात. पण रोज ब्रेड खाणं तुमच्या पचनसंस्थेसाठी किती योग्य आहे, याचा विचार केलाय का?
पांढऱ्या ब्रेडमध्ये बहुतांश वेळा रिफाइंड मैदा वापरला जातो. यामध्ये फायबर जवळपास नसतोच. फायबर हे पचनक्रियेसाठी अतिशय आवश्यक घटक आहे. जे अन्न पचवण्यास मदत करते आणि शौचास जाणे सोपे करते. त्यामुळे, ज्या अन्नपदार्थात फायबर कमी असतो, त्याचा दीर्घकाळ सेवन केल्यास बद्धकोष्ठता (कॉन्स्टिपेशन) होऊ शकते. डॉ. अजित जैन (राजीव गांधी रुग्णालय, दिल्ली) यांच्या मते, ब्रेडमध्ये फायबर नसल्याने पचनसंस्थेवर प्रतिकूल परिणाम होतो.
याशिवाय, सतत ब्रेड खाल्ल्यास पोट फुगणे, गॅस, आम्लपित्त अशा त्रासांचाही सामना करावा लागतो. विशेष म्हणजे आजारी असताना लोक रोटीऐवजी ब्रेड खाणे पसंत करतात, कारण ते ‘हलकं’ वाटतं. पण हे केवळ समजुतीपुरते योग्य आहे, वैद्यकीय दृष्टिकोनातून नाही. नॅशनल लायब्ररी ऑफ मेडिसिनच्या अभ्यासानुसार, ब्रेड आणि कर्करोग यांच्यात थेट संबंध सिद्ध झाला नसला, तरीही ब्रेडमुळे पाचनसंबंधी समस्या निश्चितच होऊ शकतात.
तर मग उपाय काय?
आरोग्य तज्ज्ञ डॉ. मानसी सांगतात की, जर तुम्हाला ब्रेड खाण्याची सवय असेल, तर पांढऱ्या ब्रेडऐवजी ब्राऊन ब्रेड किंवा मल्टीग्रेन ब्रेड निवडणे अधिक चांगले. ब्राऊन ब्रेड गव्हाच्या पिठापासून बनवलेली असल्यामुळे त्यात फायबर जास्त प्रमाणात असतो, जो तुमच्या पचनसंस्थेसाठी हितकारक ठरतो.
