आपण अनेकदा फळं खाल्ल्यानंतर त्यांची साले कचऱ्यात टाकतो, पण तुम्हाला हे माहीत आहे का की या साली तुमच्या घरासाठी, आरोग्यासाठी आणि सौंदर्यासाठी अमूल्य ठरू शकतात? या सालींमध्ये नैसर्गिक तेले, अँटीऑक्सिडंट्स, जीवनसत्त्वे आणि खनिजे असतात जे केवळ त्वचा आणि केसांसाठी नव्हे तर स्वच्छता आणि बागकामासाठीही उपयोगी पडतात.
लिंबू व संत्र्याच्या सालींचा नैसर्गिक क्लिनर:
लिंबू आणि संत्री या दोन्ही फळांच्या सालींमध्ये सायट्रिक अ‍ॅसिड आणि सुगंधी तेलं असतात. या साली व्हिनेगरमध्ये काही दिवस ठेवून नैसर्गिक क्लिनिंग सोल्यूशन तयार करता येतं. हे मिश्रण स्वयंपाकघर, बाथरूम, ओटा आणि सिंक स्वच्छ करण्यासाठी वापरता येते. याचा सुगंधही प्रसन्न करतो आणि रासायनिक क्लिनरला चांगली पर्याय ठरतो.
केळीच्या सालींचं झाडांसाठी खत आणि पॉलिश म्हणून उपयोग:
केळीच्या सालींमध्ये पोटॅशियम, मॅग्नेशियम आणि फॉस्फरस असतात, जे झाडांची वाढ सुधारतात. तुम्ही या साली थेट झाडांच्या मुळाजवळ टाकू शकता किंवा वाळवून त्यांची खतासाठी पावडर बनवू शकता. याशिवाय, केळीची साल बूट, बॅग्स किंवा कातडी वस्तूंवर घासल्यास त्यांना नैसर्गिक चमक मिळते.
सफरचंदाच्या सालींचा टोनर म्हणून वापर:
सफरचंदाच्या सालींमध्ये अँटीऑक्सिडंट्स आणि व्हिटॅमिन C भरपूर प्रमाणात असतं. या साली पाण्यात उकळून ते पाणी थंड झाल्यावर चेहऱ्यावर लावल्यास त्वचा मऊ, स्वच्छ व टवटवीत राहते. हा टोनर नैसर्गिक आणि केमिकल फ्री आहे.
डाळिंबाच्या सालींचा फेसपॅक:
डाळिंबाच्या साली वाळवून त्यांची पावडर करून त्यात गुलाबजल किंवा दही मिसळून फेसपॅक तयार करता येतो. हा फेसपॅक त्वचेवरची मृत पेशी काढतो, मुरुमं कमी करतो आणि त्वचेला घट्ट बनवतो.
आंब्याच्या सालींचा केसांसाठी वापर:
आंब्याच्या सालींमध्ये स्कॅल्पला पोषण देणारी नैसर्गिक तत्त्वं असतात. या सालींचा पेस्ट बनवून दह्यात मिसळा आणि केसांना लावा. हा उपाय केस गळती कमी करतो आणि केसांना मऊपणा देतो.
साइट्रस सालींचा डासांवर परिणाम:
लिंबू, संत्री, मोसंबी यासारख्या साली सुकवून संध्याकाळी मंद आचेवर जाळल्यास त्यांचा सुगंध डासांना दूर ठेवतो. ही पद्धत रासायनिक डासनाशकांपेक्षा सुरक्षित व नैसर्गिक आहे.
स्क्रबिंग पावडर सालींपासून:
विविध फळांच्या सालींना वाळवून बेसनसह बारीक करून स्क्रबिंग पावडर बनवता येते. ही पावडर त्वचेचे मृत कण दूर करते आणि नैसर्गिक एक्सफोलिएशनचा अनुभव देते.
सालींचा सुगंधी फ्रेशनर म्हणून वापर:
लिंबू किंवा संत्र्याच्या साली वाळवून एका सूती पिशवीत भरून ती कपाटात ठेवा. त्याचा सुगंध हवामान ताजं ठेवतो आणि किटकांपासून बचाव होतो.
